Шымкентте белгісіз азамат дәмхана қызметкерін соққыға жықты

Шымкенттегі дәмханалардың бірінде ер азамат мекеме қызметкерін соққыға жықты. Жәбірленушінің айтуынша, белгісіз жігіттер ұялы телефонды саудалау үшін кафеге баса-көктеп кірген. Ғимараттан шығып кету туралы қызметкердің өтінішіне құлақ аспаған олар, алдымен сөзбен ерегісіп, соңынан жұдырық жұмсаған. Қалалық полиция департаменті бұл жәйт туралы жазбаша мәлімдемемен ғана шектелді. Баспасөз қызметінің хабарлауынша қазір болған оқиғаға байланысты тергеу жүріп жатыр. Сот-медициналық сараптамасы жасалуда. Оның нәтижесі он күннен кейін мәлім болады. Тек содан кейін ғана жәбірленушінің алған жарақатының ауыр-жеңілдігіне байланысты жауапты азаматқа шара көретін боламыз делінген баспасөз хабарламасында.

Ғани Қалмаханов