V Дүниежүзілік көшпенділер ойындарына 89 мемлекет қатысады

5-ші Дүниежүзілік көшпенділер ойындарына 89 мемлекет қатысады. Мұны Астанада өткен «Спорт – бейбітшілік елшісі» көрмесінде Туризм және спорт министрінің орынбасары айтты.

Еліміздегі Дипломатиялық қызмет күніне орай өткізілген шараға Шанхай ынтымақтастық ұйымы саммитіне қатысқан шетелдік БАҚ өкілдері де қатысты. Қонақтарға қыркүйек айында өтетін 5-ші Дүниежүзілік көшпенділер ойындары таныстырылды. Биылғы дүбірлі додада 21 спорт түрінен сайыстар өтеді. Оның ішінде қазақтың 11 түрлі ұлттық ойыны да бар. Қазір, ауқымды спорттық іс-шараға қызу дайындық жүріп жатыр. «Қазанат» ипподромы маңында қазақ ауылы құрылмақ.

Серік Жарасбаев, ҚР Туризм және спорт министрінің орынбасары:

Жалпы спортшылардың, делегациялардың сандарының қатысуы 2500-ден астам күтілуде. Сонымен қатар 100 мыңнан астам қонақ, туристер келеді деп ойлаймыз. Қазіргі уақытта оларды орналастыру үшін 32 қонақ үй дайындалып отыр қала әкімдігімен бірлесіп.

Қаракөз Тұрмағамбет