МӘМС жарнасын төлей алмайтын азаматтарға мемлекет көмектеседі

МӘМС жарнасын төлей алмай отырған азаматтарға жергілікті әкімдік бюджетінен қаржы бөлінеді. Денсаулық сақтау министрі тиісті заң жобасын әзірлеп жатыр. Бұл жайында Ақмарал Әлназарова Ұлттық арнаның «Бас тақырып» бағдарламасына берген сұхбатында айтты. Министрдің мәліметінше, қазір қорға жарна төлемейтін 3 млн-нан астам адам бар. Оның 1 млн-ы ауыл тұрғыны. Сонымен бірге министр әңгіме барысында отандық медицинадағы соңғы жаңалықтармен бөлісті. Ауылдық елдімекендердегі әбден ескірген құрылғыларды жаңарту, ана мен бала өлімінің деңгейін азайту шаралары жайында айтты.

Ақмарал Әлназарова, Денсаулық сақтау министрі:

Жергілікті атқарушы органдардың есебінен МӘМС жүйесіне тарту, МӘМС жарналарын төлеуді жергілікті әкімдіктерге жүктейтін заң жобасы бүгінгі таңда әзірленді. Жазға дейін Парламентке кіреді. Жылдың аяғына дейін бекітіледі деген ойдамыз.

Айя Мүтәлі