Отбасылық зорлық-зомбылыққа қарсы мамандандырылған бөлімшелер құрылды

Биылғы жылдың алғашқы айының өзінде тұрмыстық зорлық-зомбылыққа ұшыраған 6499 адамнан хабарлама түскен. Ал жыл сайын жалпы хабарлама саны 100 мыңға жуықтайды. Цифрды азайту үшін отбасылық зорлық-зомбылыққа қарсы күрес жөніндегі мамандандырылған бөлімшелер құрылды. Елдің барлық өңірін қамтыған орталықтар саладағы жинақталған жүйелі проблемаларды жоюға жәрдемдеседі. Орталық тек зорлық-зомбылық құрбандарын қорғап қана қоймай, құқық бұзушыларды қайта әлеуметтендірумен айналысады.

Ақмарал Серкебаева, ІІМ отбасылық тұрмыстық зорлық-зомбылыққа қарсы күрес жөніндегі басқарма басшысы:

Бөлімшенің ерекшелігі – Мемлекет басшысы тапсырмасына сәйкес мұнда барынша көбірек әйел қызметкерлер қызмет етеді. Бұл зардап шегушілердің әйел қызметкерлерге оқиғаның мән-жайын ұялмай ашып айтуына, яғни сенім факторына ықпал етеді. Осы тәсіл дәлелдерді бекітуге, жасалған әрекеттің бәрін нақты, уақтылы және егжей-тегжейлі анықтауға мүмкіндік береді.

Серік Жұмабек