Ұлытау облысындағы «Жомарт» кенішінде жетінші жұмысшының денесі табылды

«Жомарт» кенішінде жетінші жұмысшының денесі табылды. Қазір оның кім екені анықталып жатыр. Төтенше жағдайлар министрлігі баспасөз қызметінің хабарлауынша, қайтыс болған 7 адамның да денесі сот-медициналық сараптама жүргізу үшін полиция қызметкерлеріне тапсырылды.

Естеріңізге сала кетейік, кеше сағат 16:50-де Ұлытау облысындағы шахтада апат болып, 7 адам кеніште қалып қойған еді. Оқиға орнына дереу Төтенше жағдайлар департаменті күштері мен жедел жәрдем бригадалары жіберілген. Іздестіру-құтқару жұмыстары түнімен жүргізілді.

Бексұлтан-Әли Рахымбаев, ҚР ТЖМ ТЖ алдын алу комитетінің бас маманы:

Кеніштегі төтенше жағдай салдарын жоюға көмек көрсету үшін қосымша «АСС» ЖШС құтқарушылар тобы жіберілді. ТЖМ командалық оқу орталығының Ұлытау облысы ТЖД базасында және оқиға орнында жедел штаб жұмыс істейді. Ақпарат алу үшін жедел желі жұмысы ұйымдастырылды.

Азамат Бейбітұлы