Алматыда ірі қойма өртенді

Алматыда Әуезов ауданы Өтеген батыр көшесі бойындағы қоймадан шыққан алапат өрт сөндірілді. Қызыл жалын 3 мың шаршы метр аумақты шарпыған.

Ернұр Медет, тілші:

Қала аспанын торлаған қара түтін ақырындап сейіле бастады. Дәл қазір тілсіз жауды тоқтату үшін 26 бірлік техника, 100-ге жуық маман тоқтаусыз жұмыс істеп жатыр. Қоймада автобөлшектер, көлік дөңгелектері және медициналық бетперделер сақталған. Жануы тез заттар болғандықтан, өртті өшіру оңай болмады, дейді мамандар.

Абай Асылбаев, Әуезов ауданы ТЖБ бастығы:

Жанында орналасқан ғимараттың шатыры өртенуі қаупі төнді. Жедел құрам дер кезінде әрекет етіп, жанында тұрған әкімшілік ғимарат пен бизнес өкілдерінің заттарын аман алып қалды.

Ернұр Медет, тілші:

Өрт таңғы 08:30 шамасында басталған. Айналадағы тұрғындар бірден байқап, төтенше жағдайлар қызметкерлеріне хабарласқан. Таңертең төңірек түтінге тұмшаланып тұрды дейді, мұндағы жұрт.

Дәурен Ахаев, қала тұрғыны:

Біз сағат 08:15-08:20-да келгенде қара түтін шығып, кеңсенің алдын күл басып жатты. Көліктің бәрі күл болып кетті. Өрт жолды жауып тастады.

Ернұр Медет, тілші:

Айта кетейік, жыл басталғалы Алматыда 90-нан аса ірілі- ұсақты өрт дерегі тіркелген. Апта басында ғана «Сауран» базарының артындағы қойма қызыл жалынға оранған еді. Шығу себебі әлі анықталмады. 

Ернұр Медет