Америкалық делегация келіссөздер үшін Мәскеуге барды

АҚШ президентінің арнайы өкілі Стив Уиткофф Украинадағы соғысты тоқтату мәселесін талқылау үшін Мәскеуге барды. Бұған дейін Киев Сауд Арабиясында өткен келіссөздер нәтижесінде атысты 30 күнге доғаруға келіскен еді.

Кремль хабарлағандай, бітім жобасын Мәскеу қазір зерттеп жатыр. Дегенмен «Рейтер», «Блумберг» және «Ассошиэйтед пресс» агенттіктерінің мәліметінше, президент Владимир Путин Құрама Штаттар Украинаны қаруландыруды тоқтатып, бұл мемлекетте президент сайлауын өткізуге келіскенде ғана ымыраны қабылдауы ықтимал. Сонымен қатар, Путин Батыстан Украинаны НАТО-ға қабылдамауды және Украина жеріне шетел әскерін шоғырландырмауды да талап етуі мүмкін.

Арыстан Рысбек