Шекарада наурыз мерекесі тойланды

Ұлыстың ұлы күні «Қорғас» шекара маңы халықаралық ынтымақ орталығында тойланды. Қазақстан мен Қытай елінің бейтарап экономикалық аумағында киіз үйлер тігіліп, қазақтың ән-жырынан шашу шашылып, дастархан жайылды. Екі ел арасындағы ынтымақ пен сауда-саттықты арттыратын орталыққа күн сайын 4-5 мың қазақстандық қатынаса, Қытайдан да осынша турист келеді. Ал мереке және демалыс күндері халық саны екі есе артады. Мәдени-көпшілік серуенде қытай азаматтары қолдарына қыран ұстаған қазақ жігіттерінің алыптығына тамсана қарап, суретке түсіп, ұлттық өнерді тамашалады. Спорттық шараларға қатысып, қабілет-қарымдарын байқап көрді.

Қымбат Ыстамшалқызы, Қорғас қаласының тұрғыны:

Біз Қытай жақтың қазақтарында да нақ күн мен түннің теңелген күнінде, самарқанның көк тасы еріген күні бар жақсылық келсін деп, бұлақтың басына жас балаларды ертіп барып, ағаш отырғызамыз. Сондай-ақ бізде де осындай кең дастархан жайып, ауылдарымызда, аудандарымызда, әр отбасыда бізде наурызды тойлап өту болады. Ақ мол болсын! Ұлыс оң болсын! Ойлаған армандарыңыз іске ассын!

Қуаныш Қанатұлы