Жазасын өтеуші 10 мың адам рақымшылыққа ілінуі мүмкін

Конституцияның қабылдануына байланысты жарияланған рақымшылық туралы заңға сәйкес 620 адам түрмеден босатылды. Жалпы сотқа 10 мыңға жуық ұсыныс жолданды. Оның 4 мыңнан астамы қылмыстық-атқару жүйесінде жазасын өтеп жатқан азаматтарға, ал 6 мыңнан астамы пробация есебінде тұрғандарға қатысты. Заң аясында жеңіл және ауырлығы орташа қылмыс жасап, келтірген залалды толық өтеген азаматтарға рақымшылық жасалады. Ал жемқорлық, экстремизм, педофилия үшін жазасын өтеп жүргендер мен аса ауыр қылмысқа барғандар рақымшылыққа ілікпейді. 

Нияз Рыспаев, ІІМ қылмыстық-атқару жүйесі комитеті төрағасының І орынбасары:

Әрбір сотталған бойынша материалдар жеке қаралып, түпкілікті шешімді тек сот қабылдайды. Босатылғаннан кейін олар әкімшілік қадағалауында болады. Пробация қызметінің есебінде тұрған 724 азамат жазасын өтеуден босатылды, сонымен қатар 760-тан аса сотталғанның мерзімі қысқартылды.