Елде нәресте өлімі азайды

Елімізде жаңа туған нәрестелердің операциядан кейінгі өлім-жітімі үш есе азайды. Бұл туралы Денсаулық сақтау министрлігі хабарлады. Соңғы бес жылда денсаулығында туа біткен ақауы бар шақалақтар арасындағы өлім көрсеткіші 22 пайыздан 6,9 пайызға дейін төмендеген. Ал операциядан кейінгі өмір сүру деңгейі 93 пайызға өскен. Елімізде жыл сайын шамамен 1400 сәбиге ота жасалады. Туа біткен ақауларды ерте анықтау мен жүкті әйелдерді мамандандырылған орталықтарға бағыттау нәтижесінде емдеу тиімділігі артқан. Министрлік алдағы уақытта 3D-модельдеу, генетикалық технологиялар және телемедицинаны дамыту арқылы жоғары технологиялық медициналық көмектің қолжетімділігін кеңейтуді жоспарлап отыр.