Өзбекстанда Абай күнін атап өту дәстүрге айналған

Өзбекстанда Абай күнін атап өту дәстүрге айналған. Жыл сайын Ұлы ойшылдың құрметіне жыр мүшәйралары, конференциялар мен концерттер ұйымдастырылады. Бүгін көрші елдегі қандастарымыз бен Өзбекстан билігінің өкілдері Ташкенттегі Абай ескерткішіне гүл шоқтарын қойды. Өлеңдерін жатқа оқып, екі ел достығы жайында мазмұнды әңгіме өрбітті. Көрші елде Абайдың жүзге жуық шығармасы өзбек тіліне аударылған. Алдағы уақытта ақынның барлық шығармаларын тәржімалау жоспарланып отыр. Себебі Абай мұрасы – екі халыққа да ортақ рухани қазына.

Абдулла Рүстемов, Өзбекстан жазушылар одағының мүшесі:

Абайдың шығармашылығы өте кең. Дүниеге кеңінен таралған. Қанша үйренсек те, аз болады. Сол үшін біз Абайды зерттей береміз. Өзбек еліне бұдан да жақын таныстыруға әрекетімізді жасай береміз.

Икрам Хашимжанов, Қазақстан өзбектері «Достық» қауымдастығының төрағасы:

Абай өзінің рухани ұстазы ретінде Науаиды айтқан екен. Сондықтан мына Әлишер Науаи, Абай тағы да басқа ақын-жазушалар екі елдің достық көпірінің дәнекері.