Таиланд үкіметі қаруға рұқсат беруді тоқтатпақ

Таиланд үкіметі қаруға рұқсат беруді дереу тоқтататынын жариялады. Мұндай шешім өткен аптада 14-жастағы жеткіншек сегіз адамды және өзін атып өлтіргеннен кейін қабылданып отыр. Ал бұған дейін сатылған арсеналды қоғамдық жерлерде ұстауға тыйым салынды.

Айта кетсек, Таиланд азаматтары қару иелену рейтингі бойынша Оңтүстік-Шығыс Азияда алдыңғы қатарда тұр. Мұнда 10 миллионнан астам тұрғынның мылтығы немесе тапаншасы бар. BBC-дің хабарлауынша, қазір жергілікті билік азаматтарды төрт миллиондай атыс құралынан бас тартуға үгіттеу мәселесін қарастырып жатыр.