Таразда тозығы жеткен үйлер тегін жөнделіп жатыр

Таразда «Таза Қазақстан» акциясы аясында жарты ғасыр бұрын салынған үйлер тегін жаңартылып жатыр. Енді қаладағы 9 көпқабатты үйдің шатыры ауысып, сырты фиброцементті панельмен қапталады.

1970-жылдары салынған бұл баспаналар мүлде күрделі жөндеу көрмеген. Соның салдарынан үйлердің шатырдан жиі су ағатын. Мәселені шешу үшін  биыл үйлерді жөндеуге қала қазынасынан 1,5 млрд теңге бөлінді. Жалпы шаһардағы 1 438 көпқабатты үйдің үштен бірінің тозығы жеткен. Соңғы 2 жылда соның тек 27-і жөндеуден өтті. Құрылысқа қала әкімдігі 3,3 млрд теңге жұмсады.

Мақсат Рахымбеков, қала әкімдігі тұрғын үй қатынастары бөлімінің басшысы:

9 үйде әрқайсысында кемі 25-30 адамнан жұмыс істеп жатыр. Қазіргі таңда жұмыстар 80 пайызға аяқталған. Үйлердің шатыры толық орналастырылған. Сыртқы қабырғаларында майда жұмыстар жүргізілуде. Қазан айында толық аяқталатын болады.