Ақтөбе облысында әлеуметтік жауапкершілікті ұғынған «Юбилейное» ЖШС ауылға балабақша салып берді

Ақтөбе облысы, Мұғалжар ауданындағы «Алтынды» кен орнын игеріп отырған «Юбилейное» ЖШС жергілікті халықтың жағдайына ұдайы көңіл бөліп келеді.

Бұл жерден алтын 60 жыл бұрын табылған. Бұрын ашық әдіспен өндірілсе, 2003 жылдан бері шахта арқылы қазылып алынады. Негізгі жұмыстар 500 метр тереңдікте жүргізіледі. Жылына 400 мың тонна кен шығарылып, Ресейдің Урал зауытына жіберіледі.

85 мың тонна таза алтынды өндіру үшін, тау-кен байыту кешенін тұрғызу жоспарланған. Демек, болашақта шикізат жергілікті жерде өңделетін болады. Шалғайдағы кәсіпорынның жұмысымен облыс әкімі Бердібек Сапарбаев танысты. Шахтаға түсіп, жұмысшылармен тілдесті. Ұжымға әлемдегі дағдарысты еңсеріп, табысты еңбек ету қажеттігін ескертті.

Серіктестік әлеуметтік жауапкершілікке ерекше көңіл бөліп келеді. Нәтижесінде, Алтынды ауылына балабақша салынып, 56 бүлдіршін тәрбиеленуде.


Жақсыбек КЕМАЛ