Павлодарда екі бірдей мектеп оқушысын қағып кеткен трамвай жүргізушісіне қатысты іс қаралуда

Павлодардың №2 қылмыстық соты тапа-тал түсте екі бірдей мектеп оқушысын қағып кеткен 30 жастағы трамвай жүргізушісіне қатысты істі қарап жатыр. Айыпталушы кінәсін толық мойындады.

Естеріңізге сала кетейік, қайғылы оқиға қыркүйек айының 7 күні болған. Апалы-сіңілі Махаббат пен Марал Масұғұт Ломов пен Қатаев көшелерінің қиылысынан өтіп бара жатып, трамвайдың астына түсті. 10 жасар Махаббат бірден бақилық болды. Ауруханада жатып жазылып шыққан сегіз жасар Маралдың қорғаушысы бүгінгі сот отырысында қарсы тараптан 1,5 млн. теңге өтемақы өндіріп алуды талап етті. Бұл қаржы қайырымдылық мақсатқа жұмсалмақ. Яғни, шұғыл емдеуді қажет ететін балаларға бөлініп берілмек. Соттың келесі отырысы 7- желтоқсанға шегерілді.  

Болат АМАНБАЕВ