Басты Жаңалықтар Шығыс Қазақстан облысында ұн тарту комбинаты ашылды

Шығыс Қазақстан облысында ұн тарту комбинаты ашылды

03.06.2014 08:00

Шығыс Қазақстанның Шемонайха ауданында ұн тартатын және құрама жем дайындайтын комбинат ашылды. Кәсіпорында тәулігіне 600 тоннаға дейін астық өңделіп, өнімнің 15 түрі шығарылады.

Комбинаттың ашылу салтанатына облыс әкімі Бердібек Сапарбаев қатысты. Аймақ басшысының айтуынша, аталған жобаның өңірдегі агроөндірістік кешендер үшін пайдасы мол. Себебі олар бұдан былай сиыр, тауық және шошқаға арналған жем азығын басқа жақтан тасымай, осы жерден сатып алады.

30 адам жұмыс істейтін жаңа кәсіпорын заманауи технологиямен жабдықталған. Ұн тарту және жем азығын дайындау ісі толықтай автоматтандырылған.

Комбинаттың алдағы жоспары – өнімін шетел нарығына шығару. Шемонайха ауданы Ресейдің Алтай өлкесімен шекаралас орналасқан.

Көрші елде құс және мал өсірумен айналысатын шаруа қожалықтары Шығыс Қазақстанда өндірілген өнімге қазірден тапсырыс беріп жатыр.

Фарманали Мамедов, комбинаттың бас директоры:

Біздің өнім республика көлемінде сатылып, экспортқа да шығарылады. Комбинаттың ашылуы облысымыздағы дәнді дақылдар өсірумен айналысатын шаруа қожалықтары үшін де тиімді болып тұр. Себебі олар жинаған астықтарын бізге өткізе алады.

Берік КӨШЕРБАЕВ

Бөлісу