Павлодарда нан бағасы 13 теңгеге қымбаттады

Қала дүкендерінде нанның бағасы 60-63 теңгеге дейін көтерілді. Сауда орындары қожайындарының айтуынша, нан өнімдерін шығарушы негізгі кәсіпорын - Павлодар нан-тоқаш комбинаты бағаны аспандатып жіберген. Мұның себебі, қалада нан пісіретін арзан ұнның қоры таусылған. Соның салдарынан нанның бағасы 13 теңгеге дейін көтерілді.

Айта кетейік, жергілікті әкімдік пен нан шығарушы кәсіпорын арасындағы меморандумға сәйкес, әлеуметтік нанның бағасы тұрақты әрі арзан болуы тиіс. Павлодар облысы Ауыл шаруашылығы басқармасының басшысы Жанат Шұғаевтың айтуынша нан бағасы күзге дейін әлі де өзгеруі мүмкін.

Ерхан ТӘТКЕН