Францияда баланы құтқарған батыр мигрантқа ел президенті алғыс білдірді

Францияда төртінші қабаттан құлай жаздаған баланы құтқарған малилік иммигрант нағыз батырға айналды. Парижде болған оқиға туралы кадрлар тез арада барлық әлеуметтік желілерге тарап кетті. 

Мамуд Гассам қауіпсіздік арқанын қолданбай, бір минуттың ішінде-ақ балконнан балконға өрмелеп, 4 жасар баланың қолынан ұстап, оны қайта балконға көтерген.

Ал, бүгін 22 жастағы жігітті президент Эммануэль Макронның өзі Елисей сарайына шақырып, оған бүкіл француз халқы атынан алғыс білдірді.

Бұдан бөлек, Париж мэрі Гассамға қоңырау шалып, батылдығына тәнті болғанын айтып, оны «Өрмекші-адам» деп атады. Сонымен қатар, қала басшысы бірнеше ай бұрын Малиден келген иммигрантқа Францияда жаңа өмір бастауға көмектесуге уәде етті.

Мадина РАХЫМБЕК