Филиппин аралдарында «денге» безгегінен жыл басынан бері 500-ге жуық адам қайтыс болды

Филиппин аралдарында масалар тарататын «денге» безгегінен жыл басынан бері 500-ге жуық адам қайтыс болды. Аурудың өршуіне байланысты ел билігі төтенше жағдай жариялады. Денсаулық сақтау министрлігінің хабарлауынша, 2019 жылдың қаңтарынан бастап ауруға 115 мың адам шалдыққан. Бұл өткен жылмен салыстырғанда 85 пайызға артық.

«Денге» безгегіне шалдыққан адамның басы ауырып, дене температурасы көтеріледі. Ал одан емделіп жазылған соң, екінші рет ауырғанда көп жағдайда өлімге әкеледі екен. Одан көбінесе балалар мен қарт адамдар зардап шегеді. Сондықтан жергілікті билік адамдарға масадан қорғанып, қауіпсіздік шараларын қолдануды ескертіп отыр.

      Жансая ҚАПАСҚЫЗЫ