Ауғанстанның Фарах провинциясында жойқын жарылыстан кемінде 34 адам қаза тапты

27-сі жараланған. Жарылғыш зат Қандағар-Герат автомагистраліне жасырылса керек. Оның бойымен жолаушылар автобусы өтіп бара жатқанда, бомба іске қосылған. Полицияның хабарлауынша, қаза тапқандардың көбі – әйелдер мен балалар.

Әзірге оқиғаға жауапкершілікті ешбір топ өз мойнына алмады.

«Талибан» мен «Даиш» содырлары ауған күштері мен бейбіт тұрғындарын күн сайын шабуылдап жатыр. Жарылыс бүгін АҚШ пен тәліптер арасындағы бейбіт келіссөздер қайта жалғасатыны хабарланар қарсаңында болды. Ол келісім аясында, Вашингтон өз әскерін Ауғанстаннан 2020 жылдың қарашасына дейін шығаруға ниетті.

Жансая ҚАПАСҚЫЗЫ