Қостанайда шекарашылар 7 жыл халықаралық іздеуде жүрген бұрынғы банкирді қолға түсірді

Қырағылық танытқан - «Қайрақ» өткізу бекетінің сарбаздары. Күдікті 2010 жылы Шымкент қаласында екінші деңгейлі банктің директоры міндетін атқарған. Кейін 590 млн. теңгені қымқырып ізін суытыпты. 

Содан бері Украина, Ресей, Түркия мен Еуропа мемлекеттерінде жасырынып келген. Ұрлаған ақшасын молшылықта өмір сүріп, сауық-сайран құруға, ел аралап қыдыруға жұмсаған. Осы қаржыны отбасымен де бөлісіп отырыпты. Күдікті өзінің сырт келбетін өзгертіп, Өзбекстан азаматы ретінде жалған төлқұжат жасаған. Ол бұл құжатпен Ресей шекарасынан өткенімен, қазақстандық сарбаздардың қармағына ілікті. 

Бұрынғы банкир Қазақстанға отбасына жолығып, құқық қорғау орындарына өз еркімен берілу үшін келе жатқанын айтқан.

Дәуренбек ӘБДІБЕК