Ресей Украинаның Одесса портына сенбіде соққы бергенін растады

Ресей Украинаның Одесса портына сенбіде соққы бергенін растады.

Елдің қорғаныс министрлігінің мәлімдеуінше, шабуыл кезінде әскери кеме мен АҚШ-тан жеткен «Гарпун» зымырандары тұрған қойма жойылған. «Снарядтар кеме жөндейтін зауытқа да түскен», – деп жазды «BBC» агенттігі. Осы дереккөздің мәліметінше, соққы кезінде астық сақталған қоймаға зақым келмеген. Бұған дейін Украина дәнді-дақыл тұрған орынға шабуыл жасалғанын мәлімдеген еді.

Айта кетсек, өткен аптаның соңында Ыстамбұлда Ресей, Украина, БҰҰ және Түркия астық экспорттау дәлізін қамтамасыз ету туралы келісімге қол қойды. Мәміле дәнді-дақылдарды Қара теңіздің үш порты арқылы тасымалдауға жол ашады.

Арай Төлегенқызы