Семейде құрылыс кезінде адам сүйектері табылды

Семейдегі бұрынғы «Пищевик» стадионының аумағында адам сүйектерінің табылуына байланысты жаңа болжам пайда болды. Айта кетейік, бірер күн бұрын қалада салынып жатқан Жекпе-жек сарайының аумағынан, жер қазу кезінде адам қаңқасының бөліктері табылған болатын. Енді қала тұрғыны құрылыс алаңынан шыққан сүйектер сегіз жыл бұрын жоғалып кеткен әкесіне тиесілі болуы мүмкін деп күдіктенеді. Меруерт Нүрденованың айтуынша, марқұм жоғалар алдында стадионда күзетші болып жұмыс істеп жүріп, кезекті кезекшіліктің бірінен оралмаған. Содан бері із-түзсіз жоғалғандар қатарында. Алайда бұл болжам әзірге расталған жоқ. Сүйек қалдықтары сот-медициналық сараптамаға жіберілді. Ал құрылыс алаңында жұмыстары уақытша тоқтатылған.

Сол жерден сүйек табылды дегеннен кейін, жоғалған жері болғандықтан, сондай күдік болды. Сараптаманы күтеміз, бір-екі айда хабарласыңыздар деп айтты. Бір жағынан басына барсақ деп ойлаймыз. 

Табылған сүйек қалдықтары олардың шығу тегін және жерленген уақытын анықтау мақсатында сараптамаға жіберілді. Полиция мұндай жағдайларда азаматтарды дереу ішкі істер органдарына хабарлауға және полиция қызметкерлері келгенге дейін өз бетінше ешқандай әрекет жасамауға шақырады.