Қайтарылған активтер есебінен ауыл тұрғындары сумен қамтылады

Солтүстік Қазақстан облысында Преснов және Соколов топтық су торабының құрылысын аяқтауға қайтарылған активтер есебінен 2,7 млрд теңге бөлінді.

Жоба Преснов су құбыры арқылы Есіл, Мамлют және Жамбыл аудандарындағы 43 ауылды, ал Соколов су құбыры арқылы Қызылжар ауданындағы 10 ауылды сапалы ауызсумен қамтуға мүмкіндік береді. Аталған елді мекендерде 38 мыңнан астам адам тұрып жатыр. Солтүстік Қазақстан облысында еліміздегі ең ұзын топтық су құбыры желісі орналасқан. Ұзындығы 3 мың шақырымнан асады. 229 ауылды сумен қамтамасыз етеді. Былтыр Арнаулы мемлекеттік қордан инфрақұрылымды дамытуға 45 млрд теңгеден астам қаражат бөлініп, 48 жоба қамтылған болатын. Преснов және Соколов топтық су құбырларын жыл соңында пайдалануға беру жоспарланған.