Полиция келбеті: Ашықтық пен айқындық

Ашықтық пен айқындық. Полиция қызметінің қазіргі басты ұстанымы - осы. Өйткені қарапайым халықтың тәртіп сақшыларына деген сенімі селдіреп, селкеу тартқан уақыт. Соңғы жылдар бедерінде Ішкі істер саласы қызметкерлерінің қожыраған жұмысы қоғамның көңілінен шықпай жүргені өтірік емес. Сондықтан Қазақстан полициясы үлкен реформаны қолға алды. Алғашқы нәтижелері жаман емес.

Алдымен, басшылық құрамның штаттық кестесі қысқарды. Тұрғындарға қызмет көрсетудің жаңа үлгісіне көшті. Бұрынғы басшылық қараша халық түгілі, тілшіні көрсе, бетін басатын, қасқыр көрген қояндай шыр айналып қашатын. Тіл-көзіміз тасқа, ведомствоның жаңа басшысы Ерлан Тұрғымбаев бүгінде жұртшылықпен өзі жеке кездесе бастады. Жақсы нышанға баладық. Уақыт көрсетер.