Таулы Қарабақта ымыра тағы да бұзылды

Әзірбайжан мен Армения Таулы Қарабақта жаңадан жарияланған ымыраны бұзды деп бір-бірін айыптап отыр. Тараптар сенбі күні атысты тоқтатуға келіскен еді.

Алайда бүгін Баку қарсы жақты Гаранбой, Тертер, Ағдам аймақтарына артиллериямен соққы берді деп кінәлады. Ал армян күштеріне сенсек, Әзірбайжан олардың майдан шебіндегі позицияларына бітім күшіне енгеннен кейін де оқ жаудырған. 

Таулы Қарабақта әскери жанжал қыркүйектің 27-де басталып, мыңнан астам адам мерт болған. Этникалық армян күштері 710 жауынгер мен 32 бейбіт тұрғын жоғалтты. Ал Әзірбайжан армиясынан қанша сарбаз қаза тапқаны әзірге белгісіз. Бір анығы – майдан шебінен алыс жатқан қалалар да шабуылға ұшырай бастады.

Иса Гүлиев, Ганджа қаласының тұрғыны:

Бұл – әзерилердің, Әзірбайжанның жері. Жылдар, ғасырлар бойы Таулы Қарабақ пен оның айналасындағы аудандар бізге тиесілі болды. Кезінде оларға өз территориямыздан жер бердік. Қарсыластарымыз соны қайтарғысы келмейді. Ганджа майдан шебінен алыс жатыр. Соған қарамастан, бізге де шабуыл жасалды. Мұны өздеріңіз де көріп тұрсыздар. 

Арыстан Рысбек