Бішкекте Абай ескерткіші бой көтерді

Бішкекте Ұлы Ақын - Абай Құнанбайұлының еңселі ескерткіші бой көтерді. Бұл - шет мемлекеттерде қойылған ең үлкен тас мүсіндердің бірі. Ашылу рәсімне қатысқан Мемлекет басшысы бұл күнді қазақ пен қырғыздың рухани өміріндегі ерекше күн ретінде бағалап, бауырластық пен достықтың ешқашан мызғымайтынына сенім білдірді.

Қасым-Жомарт Тоқаев, Қазақстан Республикасының Президенті: 

Ағайын елдердің тамырластығын кезінде Абай да айтқан. Ұлы ақын қазақтың тарихына тоқталған кезде қырғыз бауырларды ерекше атап өткен. Ол «Еш қазақ қырғыз бен қазақтың бір тұқымдас екеніне таласпайды» деген. Шын мәнінде, екі ұлттың тегі мен тілі бір, жүрегі мен тілегі бір. Айыр қалпақты ағайынға біздің ықыласымыз қашанда ерекше. Көп ұзамай елімізде Манас ескерткіші бой көтереді. Бұл есім қазақ арасында өте танымал. Әйгілі Манасқа құрметіміз ерекше. Манастану ғылымының негізін қалаған Шоқан Уәлиханов екенін еске салғым келеді.

 Садыр Жапаров, Қырғыз Республикасының Президенті: 

Жазда жайлауы, қыста қыстауы қоңсы қонған екі халықтың рухани әлемінің жақындығын Абай мен Тоқтоғұлдың, Мұхтар мен Шыңғыстың мұралары көрсетіп келеді. Абайдың 175 жылдығы кезінде Ұлттық кітапханадан арнайы мәдени бұрыш ашылғанын да еске салғым келеді. 

Сондай-ақ қырғыз елінің астанасынан Әл-Фараби атындағы Қазақ ұлттық университетінің филиалы ашылды. Оқу орны жаңа оқу жылына студенттер қабылдауға дайын. Әзірге 5 мамандық бойынша оқытады. Өзге де қазақстандық университеттер бауырлас елде өз филиалын ашуға ниет танытып отыр.

Шерхан Жамбылұлы