Солтүстік Қазақстанда маралдар қырылып жатыр

Солтүстік Қазақстан облысындағы «Красный бор» арнайы табиғи аумағында маралдар қырылып жатыр. Ондаған жабайы жануардың өлексесі қорыққа жақын маңдағы Заречный ауылының қоқыс полигонына тасталған. Талап бойынша өлекселер арнайы орында жойылуы тиіс. Қорықтың аумағы 62 мың гектардан асады.

Былтырғы санақ бойынша мұнда 1300-ден астам марал тіркелген. Табиғи аумақта еліктер мен қабандар да тіршілік етеді. Мемлекет қорғауына алынған жануарлардың қысқы жеміне 5,5 млн теңге бөлінген. Мамандар азықтың жеткілікті екенін айтады.

Қуан Есімов, Табиғат ресурстары және табиғатты пайдалануды реттеу басқармасының бас маманы:

Қыс бойы жаңбыр жауды, одан кейін қатты аяз болды. Оның үстіне бізде қардың көлемі өте көп. Сондықтан да оларға азық табу өте қиын. Маралдардың басты өлу себебі – олардың әлсіз болуы. Сараптама нәтижесі бойынша оларда инфекциялық аурулар табылмаған.

Эльмира Кәленова