️Еліміздегі мектептерге вейп алып кіруге тыйым салынады

Жазғы демалысқа қарамастан мектептегі баланың қауіпсіздігін күшейту жұмыстары тоқтаған жоқ. Оқу ағарту министрлігінің бұйрығымен білім беру ұйымдарына кіргізуге тыйым салынған тізім тағы да кеңейді. Қандай заттарға тыйым салынғанына тоқталсақ. Оқушылар мектепке оқ-дәрі, жарылғыш және тез жанатын, химиялық және улы заттар әкелуіне болмайды. Көрші елдегі білім беру ұйымдарына жасалған қарулы шабуылдардан кейін қауіпсіздік басты назарда. Оқу ғимаратына отшашу, пиротехниканы кіргізуге болмайды. Тыйым салынған заттардың ішінде сіріңке, оттықтар да бар. Бұл әрине өрт қауіпсіздігін сақтау үшін қажет екені түсінікті. Көзден жас ағызатын, бұрышты газ балондарын да ғимаратқа кіргізуге тыйым салынған. Негізі тыйым салынған тізімде бұл заттар бұрыннан бар. Биыл қосылғандары темекі өнімдері, вейптер және оның дәмдеуіштері. Кей белсенділердің жүргізген әлеуметтік сауалнамасының қорытындысы бойынша оқушыларының тең жартысы Вейп шегіп көрген. Заң бойынша тыйым салынғанымен әлі де сатылып жатыр. Соңғы 2 жылда елімізде электронды темекінің айналымы 300 есе артқан. Осы уақыт аралығында ел аумағына 3 млн дана вейп шекарадан кіргізіліпті. Министрліктің бұл бұйрығы 20 маусымнан бастап күшіне енеді. Балалардың тыйым салынған заттарды мектепке кіргізгені үшін ата-анасы мен заңды өкілдері жауапты екенін айта кеткен жөн.