Испанияда такси жүргізушілері шеруге шықты

Испанияда такси жүргізушілері шеруге шығып, жолдарды бөгеді. Олардың қарсылық акциясын ұйымдастыруына сақтандыру құнының күрт өсуі себепші. Айтуларынша, мұндай полистің бағасы кейінгі үш жылда 300 пайызға қымбаттап, табыс табу қиындап кеткен. Демонстрация салдарынан өзге жүргізушілер басқа жолдарды таңдауға мәжбүр болды. Сонымен қатар, наразылық барысында демонстранттар Uber онлайн такси-қызметін апаттардың көбеюіне кінәлі деп айыптап, тәжірибелі жүргізушілердің сақтандыруға олармен бірдей шығындалуын әділетсіздік деп атады. Ал Барселонада шерулеткен автомобильдер легі әуежайдан қала орталығына дейін созылған.

Хоакин Алонсо, такси жүргізушісі:

Мен мұнда сақтандыру полисіне қатысты заңсыздыққа қарсылық білдіру үшін келдім. Полистің құны аяқ астынан 200-300 пайызға көтерілген. Шынымды айтсам, мен үшін ол 30 пайызға қымбаттады. Бірақ әріптестерім 6-7 мың еуро төлей бастағанын айтып отыр.

Арыстан Рысбек