Елімізде доллар тағы қымбаттады

Қазақстан нарығында доллар тағы қымбаттады. АҚШ валютасы соңғы үш күнде 12 теңгеге өскен. Қор биржасында бір көк қағаздың құны қазір 518 теңге. Ал кейбір ақша айырбастау бекеттерінде 525 теңгеден сатылып жатыр. Сарапшылардың пайымынша, доллардың күрт көтерілуіне АҚШ президентінің импорттық тауарларға баж салығын енгізуі себеп. Сондай-ақ мұнай бағасының 63 долларға дейін төмендеп кетуі де нарыққа әсер етіп отыр.

Бауыржан Ысқақов, экономист:

Әлемдік өзгерістер, геосаяси жағдайлар бұрынғыдай ай сайын, жыл сайын емес, күн сайын өзгеріп жатыр. Яғни, біздің де соған сай бейімделуіміз керек. Бұрын 5 жылға жоспарлап қоятын болсақ, қазір оны кем дегенде 5 айға дейін қысқартатындай уақыт келді. Салық саясаты, кеден бажының қымбаттауының өзін Қазақстан өзінің мүмкіндігі ретінде пайдалану керек. Қытайға, Америка штаттарына тауар шығару қиындаған уақытта біз сол нарықты алатындай, біз сол нарықтың орнын басатындай транзиттік мүмкіндіктерімізді пайдалануымыз керек.

Айя Мүтәлі