BBC Трамптан кешірім сұрағанымен, оған өтемақы төлеуден бас тартты

Британияның хабар тарату корпорациясы BBC АҚШ президенті Дональд Трамптың сөзін бұрмалағаны үшін кешірім сұрады. Бірақ әйгілі медиа ұйым Америка лидеріне өтемақы төлеуден бас тартып отыр. Сонымен қатар өткен тәулікте жариялаған мәлімдемесінде BBC «Панорама» бағдарламасында Трамп жайлы материалды енді көрсетпейтінін хабарлады. Айта кетсек, бұған дейін Ақ үй басшысының адвокаттары аталған корпорация кешірім сұрап, эфирге қате берілген сөзді жоққа шығармаса, сотқа шағымданып, одан 1 миллиард доллар өтемақы талап ететіндерін ескерткен еді.