Қарағанды облысында табиғатқа нұқсан келтірген кәсіпорындарға айыппұл салынды

Қарағанды облысында бірнеше ірі кәсіпорын экологиялық талаптарды бұзғаны үшін 23 миллион теңге көлемінде айыппұл арқалады. Облыстық Экология департаменті жүргізген тексерулер барысында табиғатты қорғау заңнамасының бірнеше рет бұзылғаны анықталған. Мәселен, Қарағайлы байыту фабрикасында атмосфералық ауаны қорғауға қатысты талаптар ескерілмегені белгілі болды. Кәсіпорынға 9 миллионға жуық айыппұл салынды. Ал «Топар басты тарату электр станциясында» су құрамындағы мұнай өнімдерінің мөлшері нормативтен үш есе жоғары болған. Балқаш мыс балқыту зауытында да жоспардан тыс тексеріс өтіп, заң бұзушылықтар анықталды.

Зейнеп Қоңырбаева, Облыстық Экология департаментінің бас маманы:

Жоспардан тыс тексеріс дегеніміз Е-өтініш арқылы түскен өтініш негізінде тексеріс аштық. Нәтижесінде екі бұзушылық анықталды. Атмосфералық ауаға жол беретін шығарындылардың нормативтен асып кетуі, екіншісі ластаушы заттардың атмосфералық ауаға ұйымдастырылмаған түрде шығуы анықталды.