Маңғыстауда мұнай кен орнындағы өрт әлі лаулап жатыр

Маңғыстауда «Оңтүстік Қаратұрын» мұнай кен орнындағы өртті өшіру үшін, жанынан қосымша ұңғыма қазып, қысымды төмендетуге шешім қабылданды.

Ол үшін бір-екі күнде жобалық-сметалық құжат әзірленеді. Айта кетейін, Ақтаудан 277 шақырым жерде орналасқан кен орнында ұңғыманы жөндеу кезінде өрт шықты. Мамандар қызыл жалынды 8 күннен бері ауыздықтай алмай жатыр. Газ-су аралас қоспа үздіксіз атқылап жатқандықтан, диаметрі 25 метрдей терең шұңқыр пайда болып, ұңғыма төмен түсіп кеткен.

Рахман Қаленов, ҚР ТЖМ Өнеркәсіптік қауіпсіздік комитетінің департамент директоры:

Бүгін-ертең құжат дайындалатын болса, жаңағы бұрғылау мекемесі өзінің станоктарын, құрал-жабдықтарын сол жақта орналастырып, қазу жұмыстарын бастайды. Қазір былай айтқанда, ұңғы сағасын қандай да бір жабдықпен жауып, или болмаса ауыздықтаймын дейтін мүмкіндік жоқ.

Аягөз Оралбайқызы