Петропавлдағы балабақша қызметкерінен туберкулез анықталды

Петропавлдағы «Балдәурен» балақбақшасының медициналық қызметкерінен туберкулездің ашық формасы анықталды. Ол аз болғандай бүлдіршіндер ұйықтап жатқанда ғимаратта дезинфекция жұмыстары жүргізілген. Ата-аналардың айтуынша балалардың кейбірі үйге келгеннен кейін тамағы ауырып, көздері ашығанына шағымданған. Медицина қызметкерінің жұқпалы ауруға шалдыққаны 2 қазан күні анықталған. Алайда санитариялық-эпидемиологиялық бақылау департаментінің мамандары бұл деректі балабақша әкімшілігіне кеше ғана хабарлаған. Ал ата-аналар бұл жағдайды кездейсоқ білгендерін айтады. Мекеме карантинге жабылған жоқ. Бүгін 340 баланың 150-ден астамы балабақшаға барған.

Асхат Мақсұтұлы, ата-ана:

Дезинфекция сағат 4-те болып отыр. Ал балалар 6-ға дейін жүріп отыр мында. Қалай балаларды тексеретінін мен білмей тұрмын.

Нәзір Жәшібеков, облыстық білім басқармасының басшысы:

Науқаспен қарым-қатынаста болған адамдардың барлығы медициналық тексерістен өтеді. Ол жұмыстан уақытша шеттетілді. Арнайы комиссия құрылды. Мәселенің мән-жайын анықтаймыз.

Эльмира Кәленова