Еуропа әуежайлары кибершабуылға ұшырады

Өткен тәулікте Еуропа әуежайлары тағы да қиындықтарға тап болды. Солардың қатарында Лондонның «Хитроуы» да бар. Бұл авиациялық терминалдардың компьютерлеріне шабуыл жасалып, тіркеу және жүктерді сұрыптау жүйесі істен шыққан. Сондықтан жүздеген рейс кешікті. Брюссель әуежайы болса, жүйенің қайта іске қосылғаны жөнінде ақпарат жоқ екенін алға тартып, авиакомпанияларға бүгін де әуе сапарларының жартысын доғаруға шақырды. Еуропа одағының ұшу қауіпсіздігі жөніндегі ұйымы да дүйсенбі күні авиарейстерді тоқтата тұруға кеңес беріп отыр. Қазір оқиғаның себебі тергеліп жатыр. Болжамдарға қарағанда кибершабуылдардың ар жағында хакерлер, қылмыстық топтар және мемлекеттік құрылымдар тұруы мүмкін.