Түркияда жер сілкінісінен 260 сағаттан өткен соң ұл бала құтқарылды

Түркияның Хатай провинциясында үйінді астында 260 сағат жатқан ұл бала тірі табылды. Мұның алдында Кахраманмараш қаласында 42 жастағы әйел құтқарылған. Ол құлаған ғимараттың астынан зілзаладан кейін 258 сағат өткенде шығарылды.

Түркия мен Сирияда 7,8 баллдық жер сілкінісі 6 ақпанда болды. Одан екі елде 42 мыңнан астам адам қаза тапты. Сонымен қатар 48 мыңдай ғимарат құлаған немесе зақымданған.

Жалпы алғанда, Түркияда бұл табиғи апаттан 15 миллиондай адам зардап шекті. Сондықтан, Бірікен Ұлттар Ұйымы бейсенбі күні халықаралық қауымдастықтан апат жайлаған аудандардың халқына көмекке 1 миллиард доллар жинау туралы өтініш жасады.

Арыстан Рысбек