Басты Жаңалықтар Елді мекендерге тарихи атауын қайтару ұсынылды (ВИДЕО)

Елді мекендерге тарихи атауын қайтару ұсынылды (ВИДЕО)

03.06.2014 12:30

Соңғы бес жылда елімізде атаның аты ауылға, көкенің аты көшеге беріліп, ономастикада бірқатар олқылықтар болды. Бірақ, дер кезінде мораторий жарияланып, қазір елді мекен, көше, білім және мәдениет мекемелерін оңды-солды атай салу тоқтатылды.

Ал, мораторий күшін жойғанда бұл мәселе қалай болмақ? Талдықорғанда Тіл комитеті ұйымдастырған республикалық басқосуда осы және басқа да өзекті мәселелер көтерілді.

Қуаныш Қанатұлы, тілші:

Такси жүргізушісінің «Кировск, Кировск» деп тұрған елді мекені Балпық би ауылы. Ал, оған іргелес орналасқан ауыл Бақтыбай деп аталады. Бірақ, халық әлі де «Крупская», деп айтып келеді. Қос ауылдың аты ауысқанына 20 жылдан асса да, Кеңес дәуіріндегі атаулар ел ішінде ескірер емес.

Бұл - осы облыстағы бір ғана мысал. Ең бастысы, ауылдар тарихи атауын алды. Ал, қазақ даласында кеңестік кезеңді дәріптейтін елді мекендер әлі де бар.

Жанай Омаров, ҚР Мәдениет вице-министрі:

Керегетас ауылы Пролетарка, Тастөбе Митрофановка деп атала бастады. Сол кезде қазақ атауларын қасақана жойып тастау деген сөз ғой.

Сондықтан, Тіл комитеті мен республикалық онамастика комиссиясында ауыл-аймаққа тарихи атауларды қайтару мәселесі жиі көтеріледі. Сондай-ақ, ол өзгертулерді жылдамырақ заманауи технологияларға енгізу керек.

Нұртөре Жүсіп, «Айқын» республикалық газетінің бас редакторы:

Халыққа қызмет көрсету жүйесін жақсарту үшін елді мекендердің, көшелердің атауларын осы GPS жүйесіне енгізу - болашақ еншісіндегі мәселе.

Жер-су аты - халықтың хаты. Айналаны қоршаған атаулар кейінгі ұрпаққа қалады. Ал, оның мәнді де мағыналы болуына қазіргі буын жауапты.

Қуаныш ҚАНАТҰЛЫ

Автор

Қуаныш Қанатұлы

Бөлісу