ОҚО-да «Жасыл өнімге-жасыл жол» рұқсат қағазы бар жүк көліктерін тексеруге тыйым салынды

ОҚО-да жыл сайын 1 миллион тоннадан астам бақша өнімі жиналады. Бұл өңірдің ішкі қажеттілігінен 10 есе артық. Ал, көкөніс 4 еседей көп егіледі. Бұл жердегі басты қиындық өнімді сыртқа апарып сату.

Енді көлік инспекторлары көкөніс керуендерін бұрынғыдай әрбір бекетте тоқтатып, тиелген жүктің салмағын өлшеймін деп әуреге сала алмайды.

Сапарға шығар алдында бір рет қана тексеріп, жүргізушінің қолына арнайы сертификат береді. Бұл құжат жүкті діттеген жеріне дейін жеткізгенше жарамды.

Өңірде бау-бақша мен көкөністі ең көп өсіретін - Мақтарал, Шардара және Сарыағаш аудандары. Сондықтан көлікті бақылайтын жылжымалы зертханалар осы аймақтарға шоғарыланады. Ал, «Жасыл өнімге-жасыл жол» акциясы күзге дейін жалғаспақ.

Ғани ҚАЛМАХАНОВ